Потпретседателот на Интер откри дека гласините за можниот трансфер на Меси во Интер биле апсолутно невистинити бидејќи италијанскиот шампион воопшто не бил во игра за неговиот потпис.
Летово имаше разни шпекулации за тоа каде Лионел Меси ќе ја продолжи кариерата откако стана јасно дека во Барселона нема да остане. Покрај парајлиите Манчестер Сити и ПСЖ, малку посрамежливо се споменуваше и Интер.
Но, клупската легенда и сегашен потпретседател, Хавиер Занети, вели дека ништо од тоа не било вистина.
„Не, никогаш. Вистината е дека ние никогаш не бевме блиску до неговиот потпис“, призна Аргентинецот говорејќи за ESPN.
„По пандемијата клубот беше во комплицирана ситуација од економска гледна точка. Освен тоа, никому на крај памет не му падна дека Лео може да ја напушти Барселона, тоа беше изненадување за сите“, додаде.
Тоа и има логика бидејќи Интер летово продаде двајца од своите најдоби играчи, Ромелу Лукаку и Ашраф Хакими, за да ја покрие финансиската загуба.
Занети откри и дека се видел со Меси.
„Среќен сум за него. Го сретнав неодамна во Парис и го прегрнав. Тој го сакаше ова повеќе од било кој друг и го заслужи“.
