Украинскиот претседател Володимир Зеленски разговараше со Илон Маск.
На својот Facebook профил објави видео од разговорот во кој, меѓу другото, му се заблагодари на Маск и го покани во Украина.
Зеленски го сподели видеоповикот на социјалните мрежи веднаш откако Украина соопшти дека од SpaceX следната недела ќе добие повеќе сателитски интернет терминали Starlink за уништените градови.
„Значи, ако имате време, по војната, добредојдени сте. Ве поканувам“, рече Зеленски.
„Звучи добро. Со нетрпение ја очекувам посетата“, одговори Маск.
Да потсетиме, Илон Маск пред една недела објави дека неговата групација SpaceX го активирала интернет сервисот Starlink во Украина и дека неговата компанија испраќа опрема во таа земја.
„Услугата Starlink сега е оперативна. Други терминали се на пат“, објави во порака на Twitter сопственикот на Tesla и вселенската агенција SpaceX. Десет часа претходно, украинскиот вицепремиер Михаил Федоров го повика милијардерот на социјалните мрежи да испрати станици Starlink во Украина.
„Додека вие се обидувате да го колонизирате Марс, Русија се обидува да ја окупира Украина! Додека вашите ракети успешно слетуваат од вселената, руски ракети ги напаѓаат украинските цивили! Ве повикуваме да испратите станици Starlink во Украина“, побара украинскиот функционер на дигиталниот сектор.
Тој, исто така, го повика Илон Маск да ги охрабри „Русите со здрав ум“ да се спротивстават на својата влада. SpaceX последен пат лансираше втора пратка од околу педесет Starlink сателити за да обезбеди интернет конекција за корисниците ширум светот.
