Пајаците се природен дел од екосистемот на нашите домови, поради што тие се многу корисни членконоги (артроподи) кои не треба да ги убиваме.
Мислиме дека нашите домови се безбедно изолирани од надворешниот свет и приородата, но кај нас живеат многу видови пајаци. Некои се случајно заробени, додека други се краткорочни посетители. Одредени видови, пак, уживаат во затворените простори и среќно живеат и се размножуваат во нив. Овие пајаци се обично таинствени, а скоро сите на кои ќе наидеме не се ниту агресивни ниту опасни. Покрај тоа, тие ни обезбедуваат услуги како што се уништување штетници - додека некои дури јадат и други членови од нивниот вид.
Во нашите домови најчесто се среќаваат два вида пајаци - од фамилијата Pholcidae и Theridiidae, кои плетат мрежа и чекаат пленот да се фати во неа. Подрумските пајаци понекогаш ги напуштаат своите мрежи за да ловат други членови од нивниот вид преправајќи се дека се плен. Иако тие се предатори по природа - подготвени да јадат сè што можат да фатат - тие редовно ловат досадни штетници, па дури и инсекти кои носат болести - на пример, комарци. Така, убивајќи ги пајаците всушност остануваме без важен и корисен заштитник.
Природно е да се плашиме од нив. Тие имаат многу нозе и речиси сите видови се отровни - иако повеќето видови имаат отров премногу слаб за да предизвикаат проблеми кај луѓето, под услов нивните клешти дури и да ја пробијат нашата кожа. Но, треба да знаете дека пајаците не сакаат да нè фатат, и дека претпочитаат да нè избегнуваат - ние сме многу поопасни за нив отколку обратно. Каснувањата од пајаци се исклучително ретки. Иако постојат неколку медицински важни видови како црната вдовица и осаменикот, дури и нивните каснувања се невообичаени и ретко предизвикуваат сериозни проблеми.
Ако навистина не можете да поднесете пајак во вашата куќа, стан, гаража или на друго место, наместо да го убиете, обидете се да го фатите и да го ослободите надвор. Ќе најде друго место и двете страни ќе бидат задоволни од исходот. Но, ако можете да ги толерирате, сосема е во ред да останат во домот. Всушност, тоа е нормално. Исто така, дури и да не ги гледате, знајте дека тие се таму, во вашиот дом. Пајаците веројатно не се свесни дека тие се гостите во вашиот простор, меѓутоа не им е ни важно бидејќи секако не им сметате и не ве гледаат како закана. Затоа и не се агресивни кон луѓето, напротив, човекот е тој што има голема корист од нив.
