Предводникот на Јувентус признава дека синоќешниот пораз значи крај на шансите на неговиот тим да се бори за титулата во Серија А, и воедно смета дека фаворит за Скудетото е токму Интер.
Јувентус синоќа загуби со 0:1 дома од Интер со гол од пенал кој беше прво одбранет, но потоа повторен. Говорејќи за DAZN, Масимилијано Алегри прво беше прашан за контроверзностите.
„Ајде да не зборуваме за работи кои во моментот не можат да ни помогнат. Сакам да зборувам за играта. Беше добар натпревар за мојот тим, игравме добро, имавме доста удари кон голот. Штета е што загубивме“.
Алегри синоќа не беше задоволен од резултатот, а камерите тоа и го уловија.
Поразот значи крај на скриените амбиции за титулата, па затоа себа борбата ќе ја насочи кон друга цел - пласман во Лигата на шампионите.
„Конечно луѓето можат да кажат дека Јувентус е дефинитивно исфрлен од борбата за Скудетото. Она што ни треба е да освоиме доволно бодови за да го обезбедиме 4. место, а потоа да се подготвиме за наредната сезона“, вели Алегри.
„Веќе година дена работиме подготвувајќи се за наредната сезона, а тогаш ќе се обидеме да го освоиме Скудетото. Годинава почнавме лошо и ни беа потребни доста натпревари за да се опоравиме. Воедно, нѐ совладаа и индивидуални грешки во важни натпревари“.
„Треба да ја гледаме чашата како полуполна. Стануваме тим, сѐ уште имаме шанса за напредок и мора да работиме на иднината, зацврстување на тимот во сите аспекти“.
Неминовно беше и прашањето за тоа кој според него на крајот од сезоната ќе му се радува на Скудетото. Моменталната табела вели дека Милан има 66 бода (игра вечерва со Болоња), Наполи 66, па Интер со 63 (има одложен натпревар, исто со Болоња).
„Треба само да го погледнете распоредот за да сфатите дека Интер е фаворит. Остварија важна победа тука, имаат натпревар помалку, ова им беше бустер за самодовербата и после ова дерби тие се главни фаворити“, заклучува Алегри.