Македонскиот репрезентативец си ја отвори душата за тоа како му се допаѓа престојот во Лидс и играњето во најдобрата лига на Островот.
Веќе четврта сезона како Езџан Алиоски е дел од Лидс Јунајтед, но ова му е прва сезона во Премиер лигата. По три сезони играње во Чемпионшип, Џани и дружината со тренерот Марсело Биелса на чело, конечно го вратија Лидс онаму каде навивачите сонуваа цели 16 години.
„Обожавам да играм тука со овој тим. Да се игра со овој стил кој го практикуваме е неверојатно, се подобрувам секој ден и учам и по нешто ново“, вели популарниот Џани говорејќи за BBC.
Лидс сезонава стана препознатлив по отворениот напаѓачки стил кој резултираше со многу дадени, но и многу примени голови. Таквата тактика ја применува без разлика дали противникот е Ливерпул или Фулам.
„Најдоброто нешто што може да се добие од Премиер лигата е играњето против клубови кои имаат играчи кои се едни од најдобрите во Европа“.
Откако на почетокот беше резерва и влегуваше од клупата, Алиоски потоа си фати место во тимот и сезонава веќе има 17 натпревари и 2 гола.
„Можеш да играш против нив и да им покажеш кој си ти, убаво е како заедно играме и колку сме силни како тим. Едноставно убаво е што сум дел од ова“, завршува Алиоски.
Во последно време Џани беше поврзуван со трансфер во Галатасарај, но дека македонскиот фудбалер би се откажал од играње во Премиер лигата за да игра во Турција е тешко веројатно.