Шпанецот Карлос Алкарас стана првиот тенисер кој потврди дека ќе учествува на Лејвер купот што ќе се игра во септември 2024 година во Берлин.
Вториот тенисер во светот играњето во главниот град на Германија, каде ќе ги брани боите на Европа против остатокот од светот, го потврди во видео-обраќање преку Instagram.
„Го ценам Бјорн Борг, селекторот на Тим Европа, има доверба во мене. Со нетрпение очекувам да ги вкрстам силите со моите ривали и во сингл и во двојки. За мене е голема чест да ја претставувам Европа во ова натпреварување. Ќе направам сѐ за мојот тим повторно да го освои трофејот на овој турнир. Едвај чекам да слушнам кој ќе му се придружи на мојот тим следниот септември“, изјави 20-годишниот Алкарас.
Шпанецот никогаш не играл во германската престолнина и затоа со нетрпение ја очекува можноста да игра пред германската публика, за која вели дека е прекрасна.
„Возбуден сум што ќе имам можност да играм пред публиката во Берлин и да можам да го истражам градот. Едвај чекам да се видиме следната година“, заклучи второрангираниот тенисер во светот.