Тимот на Тотенхем го совлада Арсенал со 2:1 во вчерашното дерби на 35. коло од англиската Премиер лига.
Со новите три бода, избраниците на Жозе Мурињо ги задржаа барем теоретските шанси за пласман во Лигата на шампионите, додека Арсенал остана да се надева само на пласман во Лига Европа.
На табелата во Премиер лигата по 35 одиграни натпревари, Тотенхем е осми со 52 бода, Арсенал деветти со 50.
Тренерот на Арсенал, Микел Артета, рече дека е несреќен и разочаран од поразот.
„Разочаран сум и несреќен. Им кажавме на момците само да ја погодат топката, но кога ќе промашите вакви шанси станува тешко. Индивидуалните грешки се психолошки тешки. Тоа влијае на расположението. Им се извинувам на фановите. Знам колку им значи ова“, изјави Артета.
Тој сепак се надева дека тимот ќе обезбеди место во Лига Европа.
„Овој пораз е е огромен удар. Сепак, ќе се бориме во првенството и ФА Купот за да ја завршиме сезоната што е можно подобро. Сѐ зависи од нас“, додаде Артета.
