Фудбалерите на Барселона денеска имаат можност да ја освојат титулата шпански првак, за првпат по четиригодишен пост.
Барселона денеска ќе го игра градското дерби на гостински терен против Еспањол, а со победа би станала првак првпат по 2019 година.
Каталонскиот гигант досега 26 пати го освојуваше шпанското првенство, а вечерва на натпреварот што започнува од 21 часот повторно ќе има можност да го подигне шампионскиот пехар.
Во случај на триумф, Барса би стигнала до 85 бодови, што би било недостижна предност пред Реал и Атлетико на четири кола до крајот.
Интересно, ова би била прва титула за Барселона во овој век што би ја освоила без Лионел Меси во составот.
Одличниот Аргентинец дебитираше за Барса во сезоната 2004/2005 кога Каталонците ја освоија својата прва титула во овој век, а потоа ги доведе до титули во сезоните 2005/2006, 2008/2009, 2009/2010, 2010/2011, 2012/2013, 2014/2015, 2015/2016, 2017/2018 и 2018/2019, кога последен пат титулата пристигна на „Ноу Камп“.