Барселона ќе се обиде на крајот на сезонава во Каталонија да го врати Лионел Меси, пренесува Mundo Deportivo.
Меси предминатото лето како слободен играч се пресели во ПСЖ со кој има договор до јуни наредната година. Веќе има понуда да го продолжи договорот со парижаните, но сѐ уште се нема изјаснето.
Шпанските медиуми истакнуваат дека челниците на Барса можното враќање на Меси го анализираат од финансиска гледна тоичка бидејќи имаат ограничувања на платите, а тука е и финансискиот фер плеј на УЕФА.
Тренерот на Барса, Чави Ернандес, не би имал ништо против Меси да се врати во тимот од „Камп Ноу“, но прашањето е дали Аргентинецот би се вклопил во новата тактика на каталонскиот клуб.
Mundo Deportivo наведува дека раководството на Барселона ги разгледува различните опции за соработка со Аргентинецот, а планираат да му организираат и свечена церемонија на „Камп Ноу“ кога ќе се врати. Барселона е подготвена на Меси да му понуди и да биде клупски амбасадор.
Шпанските медиуми потсетуваат дека Аргентинецот порача дека за сите понуди ќе се изјасни по Мундијалот во Катар, каде оди со амбиции конечно да го освои трофејот кој му недостасува, Божицата на победата на ФИФА, која пак Арегентина ја сонува од 1986 година.
35-годишниот Меси во Барса дојде во 2000 година, а за првиот тим одигра 778 натпревари и постигна 572 гола. Со Барса освои 34 трофеи.
