Поранешната шампионка на Вимблдон, Французинката Марион Бартоли, го даде своето мислење за непопуларното тврдење дека Новак Ѓоковиќ е најдобриот тенисер досега.
Статистиката е кристално јасна и јасно ни кажува дека Новак Ѓоковиќ е најуспешниот тенисер на сите времиња. Рекордните 24 Грен слема се најдобар доказ за тоа тврдење.
Сепак, ако ја гледаме популарноста, пред него се неговите двајца најголеми конкуренти Рафаел Надал и Роџер Федерер.
Токму на оваа тема во емисијата на „RMC“ се занимаваше и поранешната француска тенисерка Марион Бартоли, која работи како тениска аналитичарка.
„Добро знаеме дека да беше Новак Американец, со 24 Грен слема, 39 Мастерси, 6 Завршни турнири, рекорд по број на недели на прво место, оној кој играл најмногу финалиња на Грен слем, би имал статуа во секој град. Ова не е случај само затоа што е Србин. Тоа е многу мала земја со исклучително турбулентна понова историја“, рече Бартоли. Французинката продолжи ласкаво да зборува за Новак.
„Тоа е играч кој се најде на насловните страници минатата година поради апсолутно неверојатен настан. Излезе надвор од спортските страници. Ако играч кој освоил најмногу титули е избркан од земја и пред да замине бил во притвор, да го ставевте во серија на Netflix, не би поверувале“, додава таа.
Бартоли смета дека резултатите на Ѓоковиќ дефинитивно може да се споредат со најголемите спортисти досега, како Мухамед Али и Мајкл Џордан.
„Може ли да влезе во дебатите поради резултатите и фактот дека победуваше во три различни децении? Да, но не во однос на популарноста“, вели Французинката.
Марион Бартоли ја заврши кариерата пред десет години, а може да се пофали дека го освои Вимблдон во 2013 година.
