Каталонците пропуштија голема шанса да ја зголемат разликата во однос на Реал Мадрид, но изненадувачкиот пораз на гостувањето кај Алмерија всушност му донесе намалување на кралскиот клуб.
Реал Мадрид одигра 1:1 во градското дерби со Атлетико, па сите очекуваа Барселона да побегне на +10 со победа во Алмерија. Тоа не само што не се случи, туку избраниците на Чави Ернандес упатија само еден удар во рамките на домашниот гол, а згора на тоа од 24. минута имаа негатива која до крајот не успеаја да ја анулираат, па го загубија натпреварот.
Чави беше нервозен на клупата, па уште во 52. минута доби жолт картон поради кој во наредното коло ќе мора да одлежи суспензија. Тогаш Барселона игра дома со Валенсија.
„Бесен сум, бидејќи го одигравме најлошиот натпревар сезонава, особено во првото полувреме“, рече Чави во изјава за Marca.
„Ни недостасуваше интензитет и ритам. Не покажавме страст за победа. Во второто полувреме се подобривме. Беше тоа тежок натпревар, а и тежок ден, но сѐ уште сме лидери со предност од 7 бодови“, додаде.
„Ќе биде тешко да се освои Ла Лига, но мораме да реагираме сега. Тука не покажавме дека сакаме да победиме“, заврши Чави.
Барса в четврток игра токму против Реал Мадрид, но во Копа дел Реј, во првиот полуфинален натпревар.
