Црвената линија на Ерменија и Азербејџан околу регионот Нагорно-Карабах е толку различна што тешко дека во догледно време двете страни ќе успеат да се договорат.
Азербејџанскиот претседател ја потенцираше црвената линија која Баку нема никаква намера некогаш да ја помине и напомена дека отцепување на самопрогласената република Арцах е неприфатливо.
„Во однос на нашата црвена линија, ние многу јасно ја потенциравме. Под никакви услови не може да биде нарушен територијалниот интегритет на Азербејџан. Под никакви околности Азербејџан нема да ја признае независноста на Нагорно-Карабах“, рече претседателот Илхам Алијев говорејќи за РИА Новости.
Во 1991 година територијата во која се наоѓа и регионот Нагорно-Карабах прогласи независност под името Арцах, но интернационално не доби признавање и де јуре останува до денес како дел од Азербејџан. Сепак, азербејџанските власти немаат никаква контрола над Арцах, а сценариото многу потсетува на Србија и Косово кое на крајот резултираше со независност на покраината.
„Азербејџан не сакаше и сѐ уште не сака да го прифати правото на самоизјаснување на Ерменците од Нагорно-Карабах. А, такво самоизјаснување на Нагорно-Карабах е, за нас, црвена линија преку која не можеме да одиме“, рече ерменскиот премиер Никола Пашинјан говорејќи за истата агенција.
Во 1805 година Нагорно-Карабах и околината станал дел од царска Русија, а со поразот на Персија (денешен Иран) во 1813 и формално Персијците им го предале регионот на Русите. Уште во тоа време населението било 90% ерменско. Еден век подоцна, Јосиф Сталин одлучува регионот да се припои кон Азербејџан и покрај тоа што е населен со Ерменци. Денес ги гледаме последиците од таа непромислена одлука.