Необична ситуација му се случи на Милан пред големото дерби против Јувентус, па дури третата опција ќе биде на голот во еден од најважните натпревари во сезоната.
Неприкосновениот владетел на стативите во миланскиот тим Мајк Мењан доби црвен картон на дуелот против Џеноа и нема да биде на следното дерби против Јувентус.
Поради отсуството на Мењан, се очекуваше меѓу стативите да биде неговата замена Марко Спортиело.
Спортиело беше донесен минатото лето токму поради оваа причина, за Росонерите да имаат резервна опција за честите повреди на Мењан и евентуалните суспензии. Но, овој повремен италијански репрезентативец се повреди на тренинг.
За време на репрезентативната пауза, Спортиело заработи повреда на мускулот, па ќе отсуствува околу две недели и нема да може да брани против Јувентус. Затоа, меѓу стативите ќе се најде сосема неочекувано име.
Ветеранот Антонио Миранте (40) ќе брани за Милан на ваков важен натпревар.
Она што уште повеќе ги загрижува навивачите на Милан е тоа што Миранте забележа само еден настап во последните три години, кога во игра влезе во самиот финиш на мечот против Верона во јуни годинава наместо Мењан.
Интересно, Миранте е „дете на Јувентус“ и токму во овој клуб дебитираше во 2004 година. Сега ќе брани против својот матичен клуб, што не влева доверба кај навивачите на Милан. Исто така, на мечот закажан за 22 октомври во игра нема да биде суспендираниот Тео Ернандес, додека некои играчи се под знак прашалник поради повреди.