Големо изненадување направи Рен, кој сензационално го победи ПСЖ со 2:0 на „Паркот на принцовите“, нанесувајќи му го првиот пораз на парискиот тим во домашната лига на последните 36 натпревари.
Интересна ситуација се случи непосредно пред почетокот на натпреварот, кога официјалниот спикер го прочита составот на играчите на ПСЖ. Сите фудбалери на парискиот тим добија аплаузи од своите навивачи, освен Лео Меси кој заработи гласни свирежи.
Меси, очигледно, се замерил со навивачите на ПСЖ по елиминацијата во осминафиналето од Лигата на шампионите, а тоа влијае и на односот на раководството на клубот кон него.
Договорот на Аргентинецот истекува на лето и тој сè уште не се договорил за продолжување. Угледниот француски весник L'Equipe пишува дека челниците на ПСЖ не се сигурни дали сакаат да го задржат, токму поради реакцијата на навивачите.
Тој пристигна во ПСЖ пред две години и оттогаш одигра 66 натпревари за францускиот клуб. Постигна 29 гола и подели 32 асистенции. Но, тој не успеа да ја оствари крајната цел на раководството на ПСЖ – освојување на Лигата на шампионите.
