Дани Алвес (39) е уапсен во полициската станица во Барселона, каде дошол да даде изјава бидејќи девојка го обвинила дека сексуално ја нападнал лани на 30 декември во ноќен клуб.
Шпанските медиуми пишуваат дека со полициско возило бил однесен кај истражниот судија, кој ќе одлучи што ќе биде со Алвес, поконкретно дали ќе оди во притвор или ќе се брани од слобода.
Инцидентот се случил во клубот во мугрите во петокот на 30 декември, а вознемирената девојка веднаш ги повикала обезбедувањето. Во полициската изјава таа навела дека Бразилецот без нејзина согласност и ја ставил раката во гаќичките, од што се обидела да се одбрани.
Адвокатскиот тим на Дани Алвес ги демантираше овие наводи, истакнувајќи дека бразилскиот фудбалер бил многу кратко во тој ноќен клуб и дека нема никаква врска со споменатиот настан. Каталонската полиција отвори истрага откако доби пријава за наводен сексуален напад.
Алвес ги негира сите обвинувања. Тој е во брак од 2017 година, а во моментот на наводниот напад дошол во Барселона на погребот на мајката на сопругата.
„Бев на тоа место со многу луѓе кои уживаа во настанот, но без да влезам во нечиј простор. Многу ми е жал, но не знам која е таа дама“, рече Алвес, икона на Севиља, Барселона и на бразилската репрезентација и најодликуваниот фудбалер во историјата.
Во кариерата освои дури 43 трофеи, што го прави најтрофејниот фудбалер досега. Во Барселона играше од 2008 до 2016 година и во сезоната 2021/22, а моментално е член на мексиканскиот УНАМ. Тој беше со Бразил на Светското првенство во Катар.
