Најголемата данска енергетска компанија Orsted соопшти дека Русија денеска ја прекинува испораката на гас затоа што Данска одбила да го плати гасот во рубли, пренесува AP.
Русија претходно ги прекина испораките на природен гас за Финска, Полска и Бугарија поради одбивањето на барањата за плаќање во рубли. Вчера Русија ѝ го направи истото на Холандија.
„Ние стоиме цврсто и одбиваме да платиме во рубли, се подготвивме за ова сценарио. Оваа ситуација и дава поддршка на ЕУ да стане независна од рускиот гас со забрзување на изградбата на обновливи извори на енергија“, рече Мадс Нипер, извршен директор на Orsted.
Рускиот претседател Владимир Путин по санкциите од Западот изјави дека непријателските странски купувачи мора да отворат две сметки во државната Газпромбанк - едната да ја плати во евра и долари, како што е предвидено во договорите, а другата да плаќаат во рубли.
Данската агенција за енергетика објави дека во првите 18 недели од 2022 година, уделот на рускиот гас бил околу 25 отсто од потрошувачката на гас во ЕУ. Агенцијата соопшти дека Данска нема веднаш да ги почувствува последиците од губењето на снабдувачите со гас.
