Фудбалерите на Сасуоло го совладаа Милан на гости со резултат 5:2 во 20. коло од италијанската Серија А, продлабочувајќи ја големата криза на „Росонерите“.
Сасуоло постигна два гола за само 120 секунди во 19-та и 21-та минута преку Дефрел и Фратеси и беше јасно дека работите не му одат добро на Милан.
Сепак, трошка надеж за домашните врати Жиру во 24. минута кога намали на 2:1, но веќе во 30. минута Берарди по третпат ја затресе мрежата на Росонерите, што беше и резултат на првиот дел од играта.
Само што започна вториот дел, Сасуоло со гол од пенал преку Лауриенте зголеми на 4:1, а Матеус Хенрике го комплетираше комплетниот дебакл на Милан со гол во 79. минута за 5:1.
Поразот на актуелниот шампион само го ублажи Ориги со гол во 82. минута за конечни 5:2.
Така, Милан ја продолжи големата криза и веќе четири натпревари, вклучувајќи го и Купот, не знае за победа и за прв пат во историјата на две последователни првенствени средби прима најмалку четири гола, откако беше поразен од Лацио со 4:0 во минатото коло.
„Росонерите“ на тој начин практично ги загубија сите шанси за одбрана на титулата, а во следното коло ќе одиграат големо дерби против Интер. Од друга страна, Сасуоло на домашен терен ќе ја пречека Аталанта.
