Италијанската премиерка Џорџа Мелони присуствуваше на одбележувањето на еврејскиот празник Ханука во Рим, а во текот на говорот се расплака додека им се обраќаше на присутните.
Мелони одржа говор во текот на палењето свеќи во Еврејскиот музеј во Рим. Порача дека еврејскиот народ го чува својот идентитет, но ги прифаќа сите останати.
„Без вера, ние не сме ништо друго освен бројки. Темнината на светот не може да ја изгаси светлината на Ханука. Расните закони биле срамота, вие сте основен дел од италијанскиот идентитет. Вие сте дел од тоа што сме сите, а идентитетот е нешто што секој дополнително го зацврстува. Приказната за овој празник е приказна за храброста и надежта на народ кој се бори во одбрана на сопствениот идентитет, верата и слободата“, изјави Мелони.
Во текот на говорот, италијанската премиерка совладана од емоциите заплака, а на крајот од церемонијата изјави:
„Ви благодарам на поканата и на убавите зборови. Ние жените одвреме-навреме сме вакви, пречувствителни. Особено ние мајките“, заклучи таа.
