Фудбалерите на Манчестер Сити во неделата по победата против Челси ја прославија третата последователна титула на шампионот на Англија, а за време на забавата посебно привлече изгледот на првиот голгетер на тимот Ерлинг Холанд, кој на прославата дојде во свилени пижами.
По последниот судиски свиреж и победата од 1:0 против Челси, на „Етихад“ имаше големо славје и се прослави официјалната титула, а потоа следуваше забава во клубот MNKY HSE, каде беше присутен најголемиот дел од тимот.
Таму најголемо внимание привлече Норвежанецот Ерлинг Холанд, кој во ноќниот клуб дојде облечен во небесно сини свилени пижами, со иницијали на џебот. Комбинација во слична боја носеше и неговата девојка Изабел Јохансен, а англиските медиуми пишуваат дека и таа носела пижами, иако на фотографијата не може да се види дали се работи за пижами или фустан.
„Тоа се спомени кои ќе ги паметам до крајот на мојот живот“, изјави Холанд за Sky, по што одговори и на прашање за тројната титула, со оглед дека ќе игра во финалето на Лигата на шампионите против Интер и во финалето на ФА Купот против Манчестер Јунајтед:
„Се боревме толку многу и искрено не знам што да ви кажам, бидејќи не планирав ништо да кажам. Посебно е и ќе уживам во овој ден, посебен момент е да се освои трофејот, а без моите соиграчи од ова не би било можно. Ова е неверојатно“.
Во остатокот од вечерта, на Холанд му се придружи татко му Алф-Инге, но тој дојде пристојно облечен - во небесно сина кошула.