Кога вулканот Хунга Тонга-Хунга Хаапаи еруптираше во јануари, создаде облак од пепел и вода што го проби третиот слој на атмосферата на Земјата. Тоа е најголемиот вулкански облак што некогаш е забележан кој стигнал до мезосферата, областа каде што обично горат метеорите и метеоритите.
Мезосферата се наоѓа на 50 до 80 километри над површината на Земјата, над тропосферата и стратосферата. Вулканскиот столб достигна висина од дури 57 километри и ги надмина претходните рекорди, по ерупциите на планината Пинатубо на Филипините во 1991 година со 40 километри и Ел Чичон во 1982 година во Мексико, кога столбот достигна висина од 31 километар.
Зошто оваа ерупција беше толку моќна?
Научниците користеле сателитски снимки за да ја одредат висината на вулканскиот столб, кој содржел доволно вода за да наполни 58.000 олимписки базени. Проценката на таа висина може да им помогне на експертите да го проучат влијанието на ерупцијата врз глобалната клима.
Ерупцијата во Тонга е една од најмоќните вулкански ерупции досега. Кога подводниот вулкан еруптираше на 65 километри од главниот град Тонга, предизвика цунами, како и ударни бранови кои се проширија низ светот. Научниците се обидуваат да разберат зошто оваа ерупција била толку моќна. Можно е причината за тоа да била тоа што паднала под вода, пишува CNN.
„Топлината на ерупцијата ја испари водата и создаде експлозија на пареа многу помоќна од класична вулканска ерупција“, вели метеорологот и климатолог Сајмон Проуд од Универзитетот во Оксфорд.
Ерупцијата привремено ќе ја загрее планетата
Експертите наведуваат дека количината на вода што овој вулкан ја испушта во атмосферата дури привремено ќе ја загрее планетата.
„Често кога луѓето помислуваат на вулкански облаци, тие мислат на пепел. Сепак, прелиминарните истражувања за овој настан откриваат дека имало и значително количество мраз во облакот. Знаеме и дека имало прилично скромна количина на сулфур диоксид и сулфат аеросоли кои се формирале набргу по ерупцијата“, изјави атмосферскиот физичар Ендрју Прата од Универзитетот во Оксфорд.
