Од месецов па сѐ до јуни украинскиот гигант ќе одигра низа пријателски натпревари со европски гиганти со цел собирање финансиски средства за помош на загрозените од војната во Украина.
Барселона, Пари Сен-Жермен, Милан, Борусија, Спортинг, Бенфика, Стеауа, Ајакс, Легија и Базел се клубовите кои изразиле желба да одиграат добротворен пријателски натпревар против Динамо од Киев.
Динамо ќе замине на континентална турнеја посетувајќи десетина земји за три месеци со цел собирање парични средства кои потоа ќе заминат кај оние на кои најмногу им е потребна помош поради руско-украинската криза.
„Благодарение на поддршката од власта на нашата земја Динамо ќе учествува во меѓународна добротворна мисија - серија на пријателски натпревари против врвни европски клубови“, се вели во клупското соопштение.
Сите натпревари ќе бидат одиграни под слоганот „Match for Peace! Stop the War!“ или „Матч за Мир! Зупинимо Війну!“ (во превод: Натпревар за мир! Да ја сопреме војната!) и ќе бидат прикажани во живо на украински и европски ТВ канали. Проектот ќе вклучи и украински уметници кои ќе патуваат со клубот промовирајќи ја мисијата.
Овие натпревари ќе служат и за одржување на формата на играчите на Динамо бидејќи, поради војната, првенството во Украина е прекинато на половина (воопшто не почна пролетниот дел). Моментално клупскиот ростер располага само со домашни играчи бидејќи на сите странци им беше дозволено да си заминат, а ФИФА дури и дозволи надвор од преодниот рок да потпишат за други клубови. Динамо располага и неколкумина репрезентативци на Украина, кои исто така треба да бидат во форма за јунскиот бараж за пласман на Мундијалот 2022 против Шкотска.
Интересно, Динамо ќе се соочи со Стеауа, романскиот тим со кој последен пат играше европско финале, она во 1986 година во рамките на УЕФА Суперкупот кога во Монако романскиот клуб победи со 1:0 благодарение на голот на легендарниот Георге Хаџи.
Турнејата почнува од Варшава каде во вторник вечер домашната Легија ќе го пречека Динамо.
