После долго чекање Ferrari конечно го претстави својот нов Le Mans хиперавтомобил кој ќе се натпреварува наредната година во Светскиот шампионат за издржливост на ФИА.
Тимот од Маранело го одбра името 499P кое ја следи номенклатурата која се користи со децении. Бројот 499 се однесува на запремнината во кубни сантиметри кај секој цилиндар, додека латиничната буква P претставува прототип. Во срцето на електрифицираниот хиперавтомобил на Ферари се наоѓа 3,0-литарски мотор со два турбополнача.
Од Ферари истакнаа дека моторот е структурно поинаков од оној во моделот 296 GTB/GT3, како и дека V6 бил избран затоа што е лесен и компактен. Развива 680 КС и соработува со електричен мотор поставен напред кој испорачува 272 КС. Се напојува од 900-волтна батерија од Формула 1, која се полни со успорување и кочење. Погонот е спарен со 7-степен секвенцијален менувач.
Хиперавтомобилот беше претставен во Имола, неговиот дизајн има карактеристики на моделот Deytona SP3, а го краси црвена боја со жолти детали како моделот 312PB од 70-тите години на минатиот век. Два автомобила ќе носат броеви 50 и 51, со тоа што првиот претставува одбележување на половина век натпреварување на Ферари на Ле Ман, додека другиот бил користен и низ историјата за тркачките автомобили на Ферари.
Ferrari 499P Le Mans на тестирањата со два прототипа помина над 12.000 километри и до крајот на годинава ќе биде потполно хомологиран. Неговото деби се очекува кон средината на март наредната 2023 година на трката Sebring 1000 Miles на Флорида, САД.
