Сцените кои ги гледам денес од Струга се крајно разочарувачки за мене. Ги толкувам единствено како целосно непочитување на здравствените работници и сите кои деноноќно работат за да ја надминеме кризата, напиша министерот за здравство Венко Филипе на Facebook, откако во тој град беше одржан масовен верски собир без да се почитуваат здравствените препораки.
„Од почетокот постојано повторувам дека без поддршка од граѓаните, здравствените работници не можат да направат ништо. Буквално ништо. Ако сакаме да го задржиме овој позитивен тренд мора ги почитуваме мерките без исклучок. Исто така, барам да се спроведе истрага како се дозволило да се случи ваков вид на собир кој е строго забранет. Апелирам до граѓаните да се воздржат од било какви собири за да конечно почнеме да го враќаме животот во нормала“, порача министерот.
Коментирајќи го масовниот верски собир во Струга, министерот за внатрешни работи Наќе Чулев во вечерашно телевизиско гостување изјави дека настанот очигледно не бил добро организиран и дека ќе биде спроведена истрага.
Станува збор за верски настан на кој традиционално се прикажуваат моштите на Георгиј Победоносец, заштитникот на градот. Во медиумите беа објавени снимки на кои се гледа дека голем дел од присутните не носат заштитни маски, ниту пак држат дистанца додека свештените лица ги носеа светите икони низ Струга. Целиот настан беше обезбедуван од полицијата.
