Британскиот боксер Тајсон Фјури ќе ја брани титулата светски првак во тешка категорија во верзијата WBC против сонародникот Дерек Чисора на стадионот на Тотенхем во Лондон на 3 декември.
Фјури веќе двапати го совлада Чисора (33 победи, 12 порази) - прво во мај 2011 година со едногласна одлука на судиите на „Вембли“, а потоа три години подоцна Чисора ја предаде борбата во 10-тата рунда, исто така, во Лондон.
Пресметката против Чисора за Фјури доаѓа откако не успеаја преговори за борба против британскиот боксер Ентони Џошуа, кој е поранешен светски првак во тешка категорија во верзиите WBA, IBF и WBO.
Непоразениот Фјури (32 победи, 1 реми) потврдувајќи ја борбата против Чисора објави на Twitter - „Одиме на Дел Бој“, алудирајќи на еден од прекарите на неговиот следен противник. „Се гледаме на 3 декември во Лондон!“, додаде.
Чисора беше далеку позаканувачки твитајќи: „Физички ќе му го одземам она што му припаѓа на Тајсон Фјури и ќе го направам мое“.