Велшкиот стратег и поранешен соиграч на Кристијано Роналдо верува дека Португалецот ќе може успешно да игра и до 40-годишна возраст.
Рајан Гигс и Роналдо играа заедно додека Португалецот не си замина од Манчестер Јунајтед летото 2009 година за да премине во Реал мадрид.
„Нормално, ќе треба да биде во вистинскиот клуб. Јас бев во голем клуб и играв до 40, можам и него да го видам како игра до таа возраст“, вели Гигс за новинската агенција PA.
„Тој се грижи за себе - се храни правилно, одмора правилно и живее за фудбалот - тој е најголемиот професионалец со кој некогаш сум играл“, тврди Велшанецот.
Роналдо сега има 35 години, а изминатава сезона во Серија А постигна 31 гол на 33 натпревари во дресот на Јувентус. Пред некој ден во репрезентацијата на Португалија го прослави голот број 101.
„Го видов на почетокот од неговата кариера и никогаш не ни претпоставив дека ќе постигнува толку многу голови. Тој беше талент и брилијантен играч кој нѐ возбудуваше. Кристијано секогаш учеше од играта и како и јас, секогаш се стремеше кон повеќе. Висеше во теретана и во умот му се вртеше само тоа колку добар би можел да биде. Во една сезона во Јунајтед постигна 40 голови и потоа сѐ што направи досега е неверојатно“, рече Гигс.
„Порано, возраста за играње фудбал беше околу 30-32 години, но сега има играчи кои играат до 40“, изјави Роналдо лани во едно интервју.
Токму Рајан Гигс играше до 40 години. До 40 играа и Теди Шерингем, Ромариу, Алесандро Костакурта, Хавиер Занети, Франческо Тоти, а над таа граница беа Паоло Малдини (41), Ривалду (43) и Роже Мила (44).
Од познатите играчи, најблиску до 40 години е Златан Ибрахимовиќ кој на 3 октомври ќе наполни 39 години и сѐ уште игра на високо ниво бранејќи ги боите на Милан.
