Се чини дека е многу лесно да се направи ова омилено италијанско јадење, но има неколку работи на кои треба да обрнете внимание за вашата пица да излезе совршена - колку што може во домашни услови.
Тестото мора да биде доволно „одморено“. Една од најчестите грешки е кога тестото прерано се трга од задолжителниот „одмор“. Важно е да е доволно подигнато за да биде помеко и повоздушно. Најдобро е потоа тестото да го растегнете со раце. Ако се повлекува по растегнувањето, тоа значи дека треба да се остави уште малку да одмори на собна температура.
Сосот од домати е најдобар ако е домашен, а за тоа треба малку труд. Откако ќе се подготви сосот од домати, само треба да го зачините по желба и да го премачкате тестото. Друга важна работа кога станува збор за состојките е никогаш да не ги ставате најевтините. Исто така, важно е да знаете добро да ги комбинирате состојките за пицата да не биде многу солена или пак блуткава.
Сега кога вашето омилено јадење е подготвено за последниот чекор, важно е да внимавате рерната да биде добро загреана. Треба да се загрее на највисока температура и дури потоа да се стави пицата и да се пече најмалку 10 минути.