Најдобриот светски тенисер, Новак Ѓоковиќ, доживеа елиминација од Австралија опен во полуфиналето откако 22-годишниот Италијанец Јаник Синер (АТП 4.) беше подобар од него со 3:1 во сетови.
Ѓоковиќ изгледаше непрепознатливо во првите два сета, кои завршија по само 36 и 39 минути игра. Италијанскиот тенисер направи два брејка во првите два сета, а ги реши во своја корист со 6-1 и 6-2.
Во третиот сет 36-годишниот српски ас одигра многу подобро, ја спаси единствената брејк-топка што му ја понуди на Синер, а сетот го одведе во тај-брејк.
Во тај-брејкот видовме голема борба, а на крајот поуспешен беше Ѓоковиќ, кој спаси меч поен, а потоа освои три поени во низа и официјално се врати во мечот со 7-6(6).
Во четвртиот гем од четвртиот сет Ѓоковиќ водеше со 40:0 на свој сервис, но Синер потоа освои пет поени во низа и направи брејк кој го спаси до самиот крај на сетот и на крајот го оствари најголемиот триумф во кариерата со вкупни 6-1, 6-2, 6-7(6), 6-3.
На тој начин Ѓоковиќ остана без можност по 11-ти пат да ја освои титулата на Австралија опен и јубилејниот 25-ти Грен слем во кариерата.
Фасцинантно е што популарниот Ноле го загуби првиот меч на Австралија опен по точно 2.195 дена. Последен пат Ѓоковиќ беше поразен во 2018 година, кога беше исфрлен од Хјон Чун во осминафиналето, а потоа го освојуваше првиот Грен слем во сезоната во 2019, 2020, 2021 и минатата година. Да потсетиме, не настапи во 2022 бидејќи му беше забранет влез во Австралија како невакцинирана личност против коронавирусот.
Колку импресивно одигра Синер говори фактот што на овој меч не му понуди ниту една шанса за брејк на Ѓоковиќ и сосема заслужено се пласираше во своето прво Грен слем финале во кариерата, каде ќе игра против подобриот од дуелот на Даниил Медведев (АТП 3.) и Александер Зверев (АТП 6.) кои треба да започнат денеска во 9:30 часот.