Новак Ѓоковиќ и Карлос Алкарас ќе се борат за титулата на мастерсот во Синсинати. Шпанецот во полуфиналето го победи Хуберт Хуркач, а српскиот тенисер беше подобар од Александер Зверев.
Алкарас, како и во претходните две рунди, со пресврт успеа да слави над Полјакот кој одигра извонреден турнир. Хуркач го доби првиот сет, убедливо со 6:2, а потоа Алкарас возврати со 7:6 и 6:3.
Со оваа победа, без оглед на резултатот во финалето, Алкарас ја задржа првата позицја на АТП листата и на УС опен ќе биде прв носител.
Број 2 на АТП листата ќе остане Ѓоковиќ, кој по голема борба, во два сета го победи Зверев. Првиот сет Ѓоковиќ го доби во тај-брејк, а вториот со 7:5, откако претходно не успеа на 5:4 да ја заврши работата. Зверев направи брејк, во веќе во наредниот гем Ѓоковиќ успеа да му го одземе сервисот, а потоа го реши мечот.
Ѓоковиќ вечерва (22:30 часот) ќе се бори за третиот трофеј во Синсинати и за 39-тата титула на мастерс турнирите.
Алкарас и Ѓоковиќ досега одиграа три меча, а Шпанецот води со 2:1. Алкарас победи лани во полуфиналето на мастерсот во Мадрид и оваа година на Вимблдон, а Ѓоковиќ годинава славеше во полуфиналето на Ролан Гарос.
