Килјан Мбапе одлучи да стане нов играч на Реал Мадрид и наскоро ќе потпише преддоговор, ексклузивно објави францускиот новинар Санти Ауна, кој вообичаено работи само со сигурни информации.
Мбапе го освои фудбалскиот свет во 2016 година кога како 18-годишник одлично се снајде во дресот на Монако, кој го предводеше до шампионската титула во сезоната 2016/2017, а веќе во 2017 година беше купен од ПСЖ за дури 180 милиони евра.
Продолжи да се истакнува во дресот на парижаните и досега има постигнато 237 гола на 284 натпревари, а секое лето се споменува неговата преселба во Реал Мадрид.
Најблиску до пристигнување на „Сантјаго Бернабеу“ беше летото 2022 година кога можеше да се пресели како слободен играч, но на крајот го продолжи договорот со ПСЖ до лето 2024 година.
Овој пат, како што пренесува Ауна, тој се одлучил за дефинитивно заминување од ПСЖ во Реал, со кого веќе ги договорил сите услови и чека само официјализирање на зделката.
Неофицијално, неговата плата во Реал ќе биде 26 милиони евра годишно, а ќе добие и 50 милиони евра само за потпишување на договорот.