Граѓаните кои примија прва доза од вакцината AstraZeneca, а сакаат да се ревакцинираат со истата вакцина, тоа може да го сторат во соседна Србија. Министерството за здравство останува на препораката да не се прима ревакцинација од AstraZeneca кај лица помлади од 60 години.
– Доколку граѓаните сметаат и имаат волја да ја примат втората доза на вакцината на AstraZeneca тоа може да го сторат во соседна Србија. Ние не препорачуваме да се прими ревакцина од вакцината AstraZeneca кај сите кои имаат возраст помала од 60 години, изјави вечерва министерот за здравство Венко Филипче на гостувањето во централниот дневник на телевизија „Сител“.
Засега, Министерството останува на ставот оваа вакцина да се дава на лица постари од 60 години.
– Ние засега нема да ја даваме вакцината на AstraZeneca кај помлади лица од 60 години затоа што сепак има мала бројка на тромботични ситуации кои се посебно предизвикани кај помлади луѓе и сметаме дека треба да бидеме внимателни. Сè уште нема јасна препорака, иако има некои најави, дали лицата кои се помлади од 60 години, а примиле прва доза од AstraZeneca дека треба да примат друга вакцина. Од препораките што ќе произлезат од националните агенции на некои европски држави или од Европската агенција за лекови, ќе зависат и нашите препораки, рече Филипче.
Појасни дека тромботичните реакции се јавуваат отприлика 14 дена по примањето на првата доза од вакцината.
Дали ќе има полициски час и рестриктивни мерки за време на претстојните верски празници, министерот рече дека тоа ќе зависи од бројот на нови случаи и притисокот за прием на пациенти кон болниците во следниот период. Одлуката, како што посочи, ќе биде донесена во текот на следната недела.
Нагласи дека состојбата се стабилизира и спласнува притисокот врз болниците, иако голем дел од одделенијата кои примаат ковид пациенти не се целосно ослободени поради тоа што се уште има голем број на дијагностицирани пациенти кои поради карактеристиките на болеста и подоцнежното влошување на состојбата, постои можност да побараат медицинска помош во следниот период.
