Продолжуваат жалбите за слабото делење на правдата на натпреварите од првата македонска фудбалска лига. По Работнички денеска со полака се јави и Вардар.
Кога се погледне резултатот од 1:5 со кој Вардар во саботата загуби од Шкендија, веројатно никој не би ни помислил дека на него влијаеле судиски грешки. Но, од „Црвено-црниот“ табор укажуваат токму на такво нешто.
„ФК Вардар, актуелен освојувач на 1.МФЛ и најтрофеен фудбалски клуб во Македонија е должен да реагира на судиските лакрдии од страна на арбитрите на натпреварот против Шкендија“, почнува соопштението на клубот.
„Би сакале да ја информираме јавноста дека судиската четворка предводена од Марјан Гоцевски (син на член на Судиски одбор на ФФМ и воедно прогласен за најдобар судија за 2019 година) целиот натпревар го водеше срамно и тотално непрофесионално. Во два наврата на очигледни ситуации за пенал во корист на ФК Вардар останаа неми и директно влијаеја на конечниот резултат. Првата најстрога казна беше на егал резултат, а втората на минимално водство на противникот. Како спорна ја наведуваме и ситуацијата при постигнување на третиот гол на противникот кој беше реализиран од офсајд ситуација“.
„Без да должиме, бараме под итно Судиската комисија при ФФМ да излезе со свое видување за овој преседан. ФК Вардар во неколку натпревари е оштетуван драстично, но сега веќе мораме да реагираме со цел да ги заштитиме играчите и стручниот штаб. Сакаме на целосното раководство на ФФМ да им потенцираме за судиските неправди, да бидат свесни и да преземат соодветни мерки за судиите кои константно влијаат на конечните резултати на многу натпревари во тековната сезона“.
Во новата сезона не се само Работнички и Вардар кои се жалат на судењето. Досега обвинувања за судиски кражби искажаа и Борец, Пелистер, како и неколку второлигаши.
„Сезонава, како никогаш досега реагираат повеќе од половината прволигашки екипи на нееднаквиот третман во делењето на правдата на натпреварите. Сето ова наведува дека г-дин Божиновски и тоа како треба да реагира. Решение мора да се најде, во спротивно ние како клубови ќе мора да најдеме начин како да се заштитиме од овие намерни грешки на дел од судиите кои имаат за цел директно да наштетат на одредени клубови“.
Од Вардар истакнуваат дека во лошото судење не бараат оправдување за поразот од тетовскиот тим: „Воедно уште еднаш сакаме да им ја честитаме победата на ФК Шкендија, клуб кој поседува голем тимски и индивидуален квалитет. Со ова известување не бараме алиби за високиот пораз, но истовремено се извинуваме на нашите навивачи со обврска напорно да работиме и до крајот на оваа полусезона да освоиме што е можно повеќе бодови и да напредуваме на првенствената табела“.