Јаболката ја носат титулата за најпознато овошје. Денес се знае дека постојат над 8.000 сорти од ова овошје, кои варираат од слатки до кисели. Имаат и свој ден кој се одбележува на 20 октомври.
Надалеку е познато дека јаболкото го чува нашето здравје и дека од него се прават едни од највкусните десерти. Во чест на ова овошје еве еден рецепт кој може добро да ви послужи за вашата свечена трпеза, без разлика за кој повод се работи, а се прави навистина едноставно.
Потребни состојки:
- 2 јаболка
- 200 гр мелени бисквити
- 1 лажичка цимет
- ½ шолја дробени ореви
за глазурата:
- ¾ шолја млеко
- 65 гр какао во прав
Подготовка:
За почеток излупете две големи јаболка, исечкајте ги на четвртинки и извадете им ја внатрешноста со семките. Потоа изрендајте ги на ситно ренде. Ренданите јаволка оставете ги на страна. Во нив додадете бисквити, потоа лажичка цимет и пола шолја дробени ореви. Мешајте ја смесата додека убаво не се поврзе. Формирајте куглици. Покријте ги со проѕирна фолија за да не се исушат. Оставете ги во фрижидер околу 30 минути.
Во меѓувреме направете ја глазурата. За тоа треба во тенџере да измешате ¾ шолја млеко и 65 грама какао во прав, и тоа да го готвите додека смесата не проврие. Цело време мешајте за да избегнете грутки и да не се лепи на дното од тенџерето. Сварениот и згуснат сос тргнете го од оган, потоа префрлете го во чинија и оставете да се излади. Извадете ги јаболковите куглици и секоја прелијте ја со чоколаден сос. Украсете ги по желба.
