Францускиот напаѓач Маркус Турам се договорил за соработка со Интер и наскоро ќе го официјализира трансферот, објавија најугледните италијански медиуми.
Синот на легендарниот француски дефанзивец Лилјан Турам доаѓа на „Џузепе Меаца“ како слободен играч, откако му истече договорот со Борусија од Менхенгладбах. Тој во нападот на „Нераѕурите“ ќе го замени боснаксиот голгетер Един Џеко, кој деновиве од Интер се пресели во Фенербахче.
Официјално трансферот ќе биде соопштен на почетокот на следната недела, кога ќе слета во Милано на медицински прегледи и последователно потпишување на договор до 2028 година.
Со оглед на тоа што оваа вест ја потврди и најпознатот трансфер-експерт, Фабрицио Романо, 99% ќе се оствари.
Во битката за потписот на Турам, Интер го победи лутиот градски ривал Милан, кој долго време го имаше на радарот и беше прва мета на „Росонерите“, а во еден момент се чинеше дека трансферот е готов.
Меѓутоа, откако Интер се вклучи во борбата за неговиот потпис, се договорија за само 48 часа. Турам во Интер ќе заработува околу 6 милиони евра годишно.
За Турам заинтересирани беа и ПСЖ и Лјапциг.
Маркус Турам е роден 1997 година во Парма, додека неговиот татко Лилјан играше за истоимениот тим. Татко му беше одбранбен играч кој настапиваше за Монако, Парма, Јувентус и Барселона. Со Франција стана светски шампион на Мундијалот 1998, како и европски на ЕУРО 2000.
