Првиот полуфиналист во Лигата на Европа е Интер, кој на неутрален терен во Германија го совлада Баер од Леверкузен со 2:1.
Италијанскиот тим ќе игра против Шахтар или Базел во борбата за финалето, а името на ривалот ќе го дознаат вечерва.
Барела го отвори резултатот во 15. минута, а Лукаку резлизираше за 2:0 во 21-та. Ѕвездата на „Аспирините“, Каи Хаверц врати еден гол четири минути подоцна, но до крајот немаше други голови.
Интер за првпат по десет години се пласираше во полуфиналето на едно европско натпреварување, поради што менторот Антонио Конте беше особено задоволен.
„Многу сме задоволни, ова беше добар натпревар, се подготвувавме за мечот на вистински начин и во ниту еден момент не сакавме да дозволиме удобно да играат со топката и да имаат посед. Го направивме она што го правевме на тренинг. Сакаме да оствариме најмногу што можеме и да одиме до крај“, рече Конте.
Финалето на второто најсилно европско натпреварување се игра во Германија, а е закажано за 21 август на стадионот во Келн.
Во вториот дуел синоќа, Манчестер Јунајтед на „Рајн Енерџи“ стадионот во Келн дури по продолженија го совлада Копенхаген и тоа со голот од пенал на Бруну Фернандеш.
„Црвените ѓаволи“ во полуфиналето го чекаат победникот од мечот Волверхемптон - Севиља.
