Финалето на најдобрата лига во американски фудбал, 55-тото издание на Супербоул што ќе се игра на 7 февруари на стадионот во Тампа, ќе биде историско бидејќи за првпат ќе го суди жена, 47-годишната Сара Томас.
Сара Томас стана првата жена што доби шанса да суди во НФЛ во 2015 година, а во 2019 година беше прва судијка во плејоф натпревар.
„Сара Томас повторно пишува историја“, рече извршниот потпретседател на НФЛ, Трој Винсент.
Томас ќе биде во составот под водство на главниот судија Карл Чеферс.
„Со нејзините елитни настапи и посветеност, таа заслужи да суди на Супербоул“, додаде Винсент.
Учесниците на 55. Супербоул ќе ги дознаеме во недела навечер, за кога се закажани финалните конференции.
