Израел изврши воздушен напад на сирискиот меѓународен аеродром во Дамаск и на некои други места на југот на главниот град на таа земја, при што загинаа пет војници и е причинета голема материјална штета, соопшти сириското Министерство за одбрана.
Сириската воздушна одбрана го пресретна тој напад и успеа да собори поголем дел од ракетите, се вели во соопштението на Министерството.
Како што пренесуваат странските агенции, Израел ги интензивираше нападите на сириските аеродроми за да ја наруши зголемената употреба на линиите за воздушно снабдување од страна на Техеран, кој ги снабдува со оружје неговите сојузници во Сирија и Либан, вклучително и Хезболах.
Техеран се одлучи за воздушен транспорт како посигурно средство за транспорт на воена опрема на своите сили и сојузничките борци во Сирија, по прекинот на копнените трансфери.
Стотици илјади Сиријци загинаа, а милиони останаа без покрив над главата откако протестите против сирискиот претседател Башар ал Асад во 2011 година се претворија во граѓанска војна, привлекувајќи странски сили и оставајќи ја Сирија поделена на зони на контрола.
