Израелската војска соопшти дека убила висок командант на Хамас, еден од главните команданти на милитантната организација, кој помогнал во планирањето на нападот врз Израел на 7 октомври.
Израелските одбранбени сили (ИДФ) соопштија дека воени авиони го нападнале Шади Баруд, заменик-шефот на разузнавачката служба на Хамас, врз основа на „прецизни разузнавачки информации“, пренесува BBC.
Објавувајќи видео од воздушниот напад во кој наводно е убиен Баруд, ИДФ рече дека Баруд „ги планирал нападите на 7 октомври заедно со Јахја Синвар“ - шефот на Хамас во Појасот Газа.
Како што понатаму јавува BBC, тие во моментов не можат да ги потврдат изјавите на израелската армија. Исто така, Хамас сѐ уште не се изјаснил по ова прашање и тврдењата на израелската армија.
Инаку, нападите на Израел врз Појасот Газа продолжија и во ноќта зад нас. Како што јави Al Jazeera, а според последните информации, неколку лица загинаа и се повредени во вториот израелски воздушен напад во кој беше уништена џамија, пренесува палестинската новинска агенција WAFA.
Во извештајот се вели дека повеќекратни напади во петокот в зори погодиле област во бегалскиот камп Ал Шати, западно од градот Газа, уништувајќи станбени згради и блиската Бела џамија.
Засега не се знае точниот број на жртви.