И покрај убедливата победа од 6:2 над Рома, за Пол Погба пласманот на Манчестер Јунајтед во финалето од Лига Европа уште не е заверен.
„Црвените ѓаволи“ синоќа имаа маестрална партија во првиот полуфинален натпревар кога на „Олд Трафорд“ буквално ја прегазија Рома со 6:2.
Јунајтед поведе во 9. минута преку Бруну Фернандеш, но потоа Рома преку Лоренцо Пелегрини и Един Џеко направи пресврт. Очигледно, тоа само ги разлути домаќините кои во вториот дел со пет гола ја наполнија италијанската мрежа. Два гола постигна Единсон Кавани, а по еден Фернандеш, Погба и Мејсон Гринвуд.
Овој убедлив триумф за многумина е гаранција дека Јунајтед веќе е во фналето, но за Пол Погба ништо не е готово.
„Секако дека резултатот е позитивен, но уште ништо не е готово. Има уште еден натпревар, така да ќе мора да останеме сконцентрирани и реваншот да го одиграме со ист менталитет“, вели Фрнацузинот за официјалната клупска веб-страница.
„Во првото полувреме направивме две грешки и примивме два гола. Кога го примивме вториот гол бевме така малку раштркани насекаде“, додава.
„На полувремето поразговаравме и рековме 'ајде да ја оправиме работава, почнувајќи од наједноставните проблеми'. Тренерот ни кажа што-како, сите бевме мотивирани да излеземе и да постигнеме колку што е можно повеќе голови“, заврши Погба.
