Јувентус повеќе не смета на својот капитен Леонардо Бонучи (36). Искусниот стопер минатата сезона се мачеше со повредите, па одигра 26 натпревари, односно 1.517 минути.
Новинарите кои го следат Јувентус тврдат дека Бонучи нема да патува на турнејата на клубот низ САД и дека повеќе не е во плановите на тренерот Масимилиано Алегри.
Неговиот договор со Јувентус истекува следното лето, а моментално е капитен на Италија со која го освои ЕУРО 2020.
Бонучи во Јувентус пристигна летото 2010 година од Бари за 15,5 милиони евра. Брзо стана еден од најдобрите дефанзивни играчи во Европа, а во сезоната 2017/2018 играше за Милан кој за него плати 42 милиона евра. Следната сезона за 35 милиони евра се врати во торинскиот клуб со кој во кариерата освои 8 титули во италијанската Серија А.