Во 50-тите години на минатиот век жените кои сакале да бидат добри домаќинки и сопруги имале можност да со купат прирачник со совети како да го задоволат својот сопруг.
Правилата и советите главно се движат околу тоа дека треба да правите сѐ што можете (а да научите што не можете) за да може сопругот да ужива во својот дом, невознемирен од други обврски освен работата што носи јадење на маса.
Денес жените се еманципирани, самостојни и независни. Голем дел имаат кариера, а слободното време не го посветуваат само на среќата и задоволството на сопругот и/или децата.
Да се биде домаќинка денес и пред 70 години не е исто, но некои работи се чини не се менуваат, барем не кај нас.
Ова се само неколку од 18-те точки од прирачникот, па вие проценете кои совети може да се применат и денес:
Ручекот мора да биде готов на време. Планирајте од напред, ако треба и ден претходно за да има вкусен ручек на маса кога мажот ќе се врати од работа. Гответе ги неговите омилени јадења Така ќе му ставите до знаење дека цел ден сте мислеле на него, но и дека се грижите за неговите потреби.
Средете се. Одморете се 15-тина минути пред да се врати домаќинот дома, за да го пречекате свежа и одморена. Поправете ја шминката, ставете панделка во косата, сменете ја облеката во која сте готвеле и работеле цел ден и пречекајте го средена и насмеана.
Не го дочекувајте со негодување и проблеми. Денот му бил тежок и напорен, ваша обврска е да го расположите и да го пречекате со уреден дом, подготвено јадење и насмевка на лицето.
На сопругот му треба мир и тишина. Кога ќе се врати дома, нека го дочека смирена атмосфера. Обврските како перење, чистење со правосмукалка или друга бучава распоредете ги во друг дел од денот, не кога тој треба да одмара после работа.
Можеби имате нешто важно да му кажете, но откако ќе се врати од работа не е време за тоа. Оставете го да зборува, сепак, неговите проблеми се поважни од вашите.
Не му приговарајте ако си дојде подоцна или замине на вечера или некое друго забавно место без вас. Ваша обврска е нему да му биде удобно и пријатно кога ќе се врати дома.
Нека се одмори во дневната или спалната соба. Подгответе му пијалак или кафе, како сака тој-така. Наместете му перниче и понудете му да му ги собуете чевлите. Зборувајте му со тивок, спокоен и нежен глас.
Не поставувајте прашања за неговите постапки и не се сомневајте во неговиот интегритет. Запамтете, тој е главен во домот и не треба да ги преиспитувате неговите одлуки.
Добрата сопруга секогаш знае каде ѝ е местото.
