Германскиот гигант Volkswagen планира да обезбеди понуда на батерии и да ја прошири инфраструктурата за полнење електрични возила во Европа, како дел од засилените напори да ја престигне Tesla и да ја направи т.н. е-мобилност поевтина.
Вториот по големина производител на автомобили во светот, кој е среде силен пресврт кон автомобили „на струја“, денеска соопшти дека планира до 2030 година да лансира шест погони за производство на батерии во Европа, кои ќе ги гради сам или во соработка со некои партнери, објави Reuters.
„Е-мобилноста стана основна работа за нас. Сега систематски интегрираме дополнителни процеси во синџирот на вредности“, изјави извршниот директор на VW, Херберт Дис.
Планираните постројки ќе имаат производствен капацитет од 240 гигават часови годишно, додаде тој, нагласувајќи дека компанијата сака да обезбеди долгорочна позиција во трката за најдобра батерија и најдобро корисничко искуство во ерата на мобилност со нула емисии.
Групацијата Volkswagen најави и партнерства со British Petroleum и водечките европски компании Enel и Iberdrola за проширување на својата мрежа на станици за полнење електрични возила.
Недостатокот на инфраструктура сè уште се смета како голема пречка за масовно прифаќање на електричните автомобили.
„Во просек, ќе ги намалиме трошоците за батериски системи на далеку под 100 евра за киловат-час“ (119 американски долари), рече членот на одборот на VW, Томас Шмал, истакнувајќи дека ова конечно ќе ја направи електронската мобилност достапна и доминантна погонска технологија.
Според декемвриските податоци на компанијата Benchmark Mineral Intelligence, цената на батериите за електрични возила падна во просек на 110 долари за киловат-час.