„Во нашата држава се регистрирани, заклучно со вчерашните податоци, 116 случаи на реинфекција и двајца починати. Ја следиме состојбата дали е возможна реинфекцијата, да можна е и на светско ниво“, соопшти денеска епидемиологот Жарко Караџовски, објаснувајќи дека вкупниот број е многу мал.
Тој соопшти дека луѓето најчесто повторно се заразуваат поради невнимателност како втор контакт со заразено лице кое најверојатно е заразено од британскиот сој за кој веќе е познато дека е многу позаразен.
Додаде дека не станува збор за невалидни тестови, 20 институции во државава имаат одобрение од Министерството за здравство да се занимаваат со дијагостика и да прават ПЦР тестови.
„Верувам дека овие резултати што сме ги добиле како реинфекција голем дел се должат на непочитување на мерките или во крајна линија на оние лица кои мислат дека не можеле да се заразат, а имале контакт со лице, кое е можеби заразено со британскиот сој“, рече тој.
Појасни дека за британскиот сој карактеристично е дека 50 до 70 отсто побрзо се пренесува, веќе е верифициран во земјава, особено во поголемите градови како Скопје, Охрид, Прилеп.
„Не може на населението да му кажеме дека ако ја прележале инфекцијата дека не може да имаат реинфекција“, рече Караџовски и додаде дека вирусот има повеќе од четири илјади мутации.
Тој дополни дека Комисијата не се занимава со тоа дали ќе има или ќе нема попис, туку даден е предлог.
Соопшти дека до Комисијата за заразни болести од повеќе државни институции било побарано протокол како ќе функционираат Собранието, Владата па дури и пописот.
„Комисијата направи предлог протокол за пописот, а на кој начин ќе се одржува тоа е политичка одлука, вели Караџовски. Ако ме прашувате што ќе се случи за еден месец отсега не можам да ви предвидам“, вели епидемиологот.
„Државата одлучува за тоа, ние само дадовме предлог за протокол“, вели тој.
Следете ја прес-конференцијата во живо: