Претседателот на Светската хокеарска федерација, Лук Тардиф, изјави дека организацијата сепак нема да ја исклучи кинеската репрезентација од учество на олимпискиот турнир во Пекинг.
„За да се разјасни ситуацијата, ИИХФ нема да го повлече кинескиот тим од Олимписките игри, статусот на машката репрезентација како земја-домаќин на олимпискиот хокеј турнир е потврден од конгресот и останува непроменет. Работиме со Кинеската асоцијација за хокеј на мраз за да ја потврдиме подобноста на нивните играчи да се натпреваруваат според правилата на ИИХФ и ќе продолжиме да им помагаме да го подготват тимот за Олимписките игри“, рече Тардиф.
Кина како домаќин автоматски се квалификуваше за ЗОИ 2022, но квалитетот на домашниот тим (32. место на светската ранг-листа) е далеку зад другите учесници. Досега во историјата на Олимписките игри не се случило земја-домаќин да биде отстранета од турнирот во хокеј на мраз.
Во септември, Тардиф изјави дека кинескиот тим може да биде отстранет од Игрите поради лошата подготвеност и неконкурентност.
„Гледањето тим како губи со 15:0 не е добро за никого, па ниту за Кина“, изјави Тардиф за агенцијата Франс прес во септември.
Олимписките игри во Пекинг ќе се одржат од 4 до 20 февруари 2022 година. Кина е во А групата со актуелниот светски шампион Канада, САД и Германија на машкиот турнир. Тоа значи дека ја чекаат три страшни натпревари, на кои кинеските хокеари може да доживеат невиден дебакл.