Конор Мекгрегор (22-4) и Дастин Поарје (26-6-1) ќе се борат на 24 јануари во Абу Даби на настанот УФЦ 257 во една од борбите што се чекаат со големо нетрпение.
Тоа ќе биде само третата борба на Ирецот во последните четири години, период во кој двапати замина во пензија, се враќаше и претрпе тежок пораз од Хабиб Нурмагомедов во 2018 година.
Тоа ќе биде втора борба помеѓу Мекгрегор и Поарје. Првата заврши со нокаут за Ирецот во првата рунда од мечот во 2014 година, па сосема е очекувано дека тој пак е голем фаворит во обложувалниците.
Сепак, шефот на УФЦ Дејна Вајт, смета дека Ирецот нема да има лесна работа.
„Слушнав дека Поарје вели дека тој е сосема поинаков борач во споредба со оној што загуби од Конор. Тој најави војна во октагонот и јас му верувам од збор до збор дека тоа ќе биде војна. Оваа борба доаѓа во вистинско време и за двајцата борачи и мислам дека ќе биде многу забавно“, рече шефот на УФЦ.
Од нивниот прв натпревар, Конор се борел само осум пати, а Поарје дури 13 пати.
„Сакам и двајцата да крвариме во рингот. Да се бориме и да ни биде тешко, бидејќи во тие услови најдобро е да се види кој е подобар борач. Ако е така, тогаш победувам во десет од десет случаи“, рече Поарје.
За потсетување, титулата во лесна категорија уште ја има Хабиб Нурмагомедов , иако е во пензија. Победникот од овој натпревар ќе се бори против првиот предизвикувач за УФЦ титулата во лесна категорија.
