Јевгениј Пригожин, водачот на приватната воена група Вагнер, ја обвини руската воена елита за напад на воениот камп на Вагнер и масовно убивање на неговите борци. Потоа, Рускиот национален комитет за сузбивање на тероризмот покрена кривична постапка против Пригожин за поттикнување вооружен бунт.
Според извештајот на руската државна новинска агенција ТАС, клучните објекти во Москва се под засилено обезбедување, а безбедносните мерки во главниот град се зајакнати. Руската безбедносна служба ФСБ издаде соопштение во кое ги повика платениците да не ги почитуваат наредбите на нивниот лидер.
Воениот известувач Андреј Рудјенко, поврзан со Кремљ, објави видео на Телеграм во кое рускиот генерал Сергеј Суровикин ги повикува војниците на Вагнер да го положат оружјето.
„Непријателот само чека да се влоши политичката ситуација во нашата земја. Во овие тешки моменти не е во ред да се игра во рака на непријателот“, рече Суровкикин додека држеше пушка на ногата.
Пригожин утрово во аудио-порака на Телеграм објави дека неговите сили собориле руски воен хеликоптер.
„Кога хеликоптерот отвори оган врз колоната цивили, беше соборен од единиците на Вагнер“, рече Пригожин.
Градоначалникот на Москва најави дека се преземаат антитерористички мерки за зајакнување на безбедноста во главниот град на Русија. Сергеј Собјанин рече дека градот воведува и дополнителни проверки на патиштата.
Според Пригожин, силите на Вагнер ја презеле контролата врз воените локации во Ростов на Дон.
Шефот на Вагнер, исто така, на видеото, објавено на Телеграм, вели дека тој и неговите луѓе се во воениот штаб на јужната област во Ростов на Дон.
