Казната што ја доби Јувентус по финансиските малверзации би можела да се прошири и на фудбалерите кои за тоа време играле за „Старата дама“, а Италијанците ги објавија имињата на 23 фудбалери кои се под истрага.
Минатата недела веста за одземени 15 бодови на Јувентус ја шокираше Италија. По истрагата за нивните финансии, која трае повеќе од една година, на Јувентус му се одземени 15 бода и тоа е тежок удар за пласманот сезонава во Серија А.
Јувентус уште некое време ќе биде на суд и она што веројатно го чека е уште построга казна, која ќе биде поврзана со настапите во Европа, но се чинеше дека играчите ќе поминат без казна. Според италијанскиот новинар и поранешен фудбалер, Паоло Ѕилиани, тоа не е точно.
Ѕилиани денеска објави сензационална вест која ја потресе Чизмата. Тој ексклузивно ги објави имињата на 23 играчи кои се под истрага за прифаќање на лажно помали плати во корист на Јувентус. Поради ова, тие се соочуваат со суспензија од 30 дена, дури и ако веќе не играат за Јувентус или воопшто не се во италијанскиот фудбал.
Постојат бројни ѕвезди што го носеле бело-црниот дрес во последните години. Меѓу нив секако се Кристијано Роналдо, Пауло Дибала, Дејан Кулушевски, Миралем Пјаниќ, како и многу други првокласни играчи.
Ѕилиани тврди дека во истрагата биле испитани сите вклучени членови и дека ги признале околностите.
„Двајцата играчи, Матајс де Лихт и Матиа Де Шиљо, им дадоа на судиите копии од разговорите во WhatsApp во кои Џорџо Кјелини им ја објаснил целата измама со тоа што сугерирал да не им го спомнуваат ова на новинарите“, наведува Ѕилиани.
Новинарот објави и официјални документи во кои се наведува времето на потпишување на договорот под името „маневри со плати“, во кои се вклучени 23 играчи. Заедно со документите, тој рече дека секое од 23-те имиња се соочува со суспензија, барем на еден месец.
Заедно со Роналдо, Дибала, Кулушевски и Пјаниќ, меѓу другите се и Леонардо Бонучи, Адриен Рабјо, Џорџо Кјелини, Џанлуиџи Буфон, Гонсало Игуаин, Арон Ремзи, Војчех Шченсни, Федерико Кјеза, Сами Хедира, како и тренерот Маурицио Сари.
