Пред почетокот на оваа сезона, Расмус Хојлунд стана еден од најскапите играчи во историјата на Манчестер Јунајтед, а првиот гол во лигата го постигна дури синоќа на Боксинг деј.
Вчера 20-годишниот Данец постигна гол во дербито од 19. коло против Астон Вила, и тоа за победа.
Во 82. минута, по корнер, Хојлунд одлично се снајде во шеснаесетникот и од волеј удар со левата нога го матираше одличниот Емилиано Мартинес за конечни 3:2 и голема победа со пресврт.
Иако постигна дури 5 гола за Јунајтед во групната фаза во Лигата на шампионите, колку му значи првиот гол во Премиершип покажа со големо славје откако ја испрати топката во мрежата.
Да потсетиме, Манчестер Јунајтед го донесе Хојлунд од Аталанта за цели 75 милиони евра иако постигна само 9 гола во Серија А.
Поради ова, челниците на „Црвените ѓаволи“ беа мета на критики од навивачите, но тие се бранеа со тоа дека донеле „мини Холанд“, па ќе видиме дали овој гол ќе сигнализира дека претстојат посветли денови и за Хојлунд и за Јунајтед.
Инаку, Манчестер синоќа губеше со 2:0 на полувреме од Астон Вила среде „Олд Трафорд“ со головите на Џон МекГин во 21. и Леандер Дендонкер во 26. минута. Пресвртот го најави Алехандро Гарначо во 59-тата, истиот играч израмни на 2:2 во 71. минута, за потоа Хојлунд да се погрижи за фантастичен Боксинг деј за Јунајтед.
