Португалскиот фудбалер Кристијано Роналдо не живее во Саудиска Арабија ни цела година, а во оваа земја веќе заработил вистинско богатство, пресметале британските медиуми.
Роналдо потпиша договор со саудиски Ал Наср на 30 декември минатата година, откако се скара со Ерик тен Хаг и го напушти Манчестер Јунајтед. Ова се покажа како вистинска мамка за фудбалските ѕвезди кои го следеа во оваа блискоисточна земја.
Во Саудиска Арабија едно по друго доаѓаа имиња како Нејмар, Садио Мане, Роберто Фирмино, Карим Бензема, Ријад Махрез, Џордан Хендерсон, Рубен Невес и многу други.
Сите тие заработуваат вртоглави пари во Саудиска Арабија, но никој не може ни да се доближи до сумите што ги кешира Роналдо. Платата на Португалецот е 203 милиони евра годишно, а интересно е што инкасира повеќе од 4 милиони евра неделно.
Британците ја пресметале бројката што досега ја заработил во Саудиска Арабија. Роналдо од декември до последната плата во Саудиска Арабија заработи нешто повеќе од 175 милиони евра, што потврдува дека трансферот вредел и повеќе.
Роналдо очигледно не дошол само за да заработи и веќе има постигнато 36 гола во својот нов клуб. Во помладата возрасна група на Ал Наср игра и неговиот син Кристијано Јуниор (13), кој покажува голем талент и игра со две години постари соиграчи.
