Костариканците ја совладаа репрезентацијата на Нов Зеланд со минимални 1:0 во баражот за пласман на Мундијалот и станаа 32. селекција која обезбеди пласман во Катар.
Натпреварот се одигра на стадионот „Ахмед бин Али“ во градот Ал Рајан во Катар каде ќе се играат и натпреварите од Светското првенство. Костарика во овој интерконинентален бараж стигна како четвртопласирана од зоната на Северна и Централна Америка, додека Нов Зеланд како победник на квалификациите во Океанија.
Решавачкиот гол беше постигнат уште во 3. минута, а стрелец беше фудбалерот на мексиканскиот Монтереј, Џоел Кембел, на асистенција на Џевисон Бенет, кој само неколку часа подоцна го прослави својот 18-ти роденден.
Нов Зеланд израмни во 39. минута преку Крис Вудс, зимското засилување на Њукасл, но ВАР го поништи голот поради прекршок. До крајот не успеаја да постигнат гол, а од 69. минута играа и со играч помалку поради исклучувањето на Коста Барбарусес.
За Костарика ова ќе биде трето последователно учество на Светските првенства, или вкупно шесто (1990, 2002, 2006, 2014, 2018 и 2022). Ќе игра во групата Е со Шпанија, Германија и Јапонија. Новозеланѓаните го бркаа своето трето учество откако претходно учествуваа на Мундијалите во 1982 и 2010.
Светското првенство во Катар ќе се игра од 21 ноември до 18 декември годинава.