Славниот британски атлетичар Мо Фарах во документарец на BBC го шокира светот со признанието дека како дете бил доведен во Обединетото Кралство илегално и тоа како жртва на трговија со луѓе, па бил принуден да работи како слуга.
Најуспешниот атлетичар откри дека името Мохамед Фарах му го дале истите луѓе кои го довеле на островот, а вистинското име му е Хусеин Абди Каин. Како деветгодишно момче бил доведен од Џибути, а кога пристигнал бил принуден да работи како слуга во едно семејство.
Легендарниот спортист претходно тврдеше дека пристигнал од Сомалија како дете бегалец, додека сега е откриено дека неговиот татко Абди бил убиен во нередите во Сомалија кога тој имал само 4 години.
Фарах вели дека имал околу 9 години кога бил одведен од дома, а жената која подоцна го одвела во Обединетото Кралство му кажала дека оди кај семејството, па тој бил возбуден поради тоа. Но, жената го одвела во Лондон и пред него ги искинала сите документи кои го спомнувале неговото вистинско семејство.
„Ги искина сите документи пред мене и ги фрли во канта. Во тој момент знаев дека сум во неволја. Морав да работам и да се грижам за деца во едно семејство ако сакав да јадам. Често се заклучував во бањата и плачев“, откри Мо.
Семејството во кое работел не го пуштало да оди на училиште, а на 12-годишна возраст сепак почнал да оди. Неговиот професор по физичко Алан Ваткинсон забележал дека момчето се трансформира кога ќе застане на патеката за трчање.
„Единствено што можев да направам за да побегнам од оваа ситуација е да излезам надвор и да трчам“, вели Фарах.
Откако му се доверил на професорот, наставникот повикал социјална служба и успеал да го смести детето кај друго семејство од Сомалија. Подоцна, почнал да се докажува како спортист и вели дека сака неговата приказна да поттикне расправа за трговијата со луѓе и ропството.
„Не знаев колку многу луѓе минуваат низ она што го минав јас. Тоа само покажува колку среќа имав. Тоа што ме спаси, што ме издвои од другите е што можев да трчам“, вели Мо Фарах.